Tenerife

Næstflottasta eldfjallaeyja í heimi!

Þó að það sé styttra til Afríku en Evrópu þegar þú lendir á Tenerife ertu samt á Spáni. Þvílík heppni að það sé alltaf sól í Afríku eins og á Spáni! Og ef hitabeltisfuglar heilla þig (sem þeir hljóta að gera) þá er Teide þjóðgarðurinn staðurinn fyrir þig. Þú þarft reyndar ekkert að fíla hitabeltisfugla til að finnast gaman þar því garðurinn er flottasti staðurinn á eyjunni.

Annars geturðu bara slappað af í sólinni með sangríu, nú eða skellt þér í sjóinn. Það er geggjað að kafa í tærum sjónum við Tenerife og svo hafa allir gaman af því að láta draga sig á risadekki á eftir hraðbáti! Þarna eru líka vatnsleikjagarðar sem eru svo sannarlega heimsóknarinnar virði.

Tenerife er eldfjallaeyja. Ekki nándar eins merkileg eldfjallaeyja og Ísland, en samt fín. Það er tilvalið að fara í gönguferðir um eyjuna og fyrir hörðustu göngugarpana er skylda að fara upp að hlíðum Teide eldfjallsins. Passaðu þig samt, eldfjallið er virkt og gaus síðast árið 1909.

Það er ekki víst að þú hafir tíma til að slappa af á Tenerife, en það er auðvitað þitt val. Ef þú nennir ekki að slappa af þá skortir þig í það minnsta ekkert að gera...

Playa de Las Americas

Ameríku-ströndin á sunnanverði Tenerife er stundum kölluð „Leikvöllurinn“ á eyjunni, sökum fjölbreytta afþreyingarmöguleika. Fríar skutlur eru út um allt til að þú náir örugglega að gera allt sem þig langar til að gera! Hvort sem þú vilt slappa af eða sletta ærlega úr klaufunum (nú eða sitt lítið af hvoru), þá er Ameríkuströndin fullkomin.

Sex strendur eru á svæðinu og fyrir utan hefðbundnar íþróttir á borð við sjóskíði, tennis, keilu og golf er meðal annars hægt að fara í teygjustökk. Eitthvað fyrir alla, sannkallaður leikvöllur þar sem af nógu er að taka.

Costa Adeje

Rétt fyrir utan leikvöllinn á Ameríku-ströndinni er Adeje ströndin. Þar ráða rólegheitin ríkjum. Staðurinn er einn sá allra fallegasti á Tenerife og algjör paradís fyrir þá sem vilja kafa. Þá er einn besti golfvöllur eyjarinnar rétt við ströndina.

Adeje gerir sig út fyrir fjölbreytta útivist þar sem framboðið er mjög mikið. Náttúrufegurðin gerir þennan stað einkar skemmtilegan, en þrátt fyrir rólegheitin er auðvelt að komast í aðeins meiri fjör og læti, til að mynda á Ameríkuströndinni sem er í aðeins nokkurra mínútna akstursfjarlægð frá Adaeje.

Los Cristianos

Er staðsett á suðurströnd Tenerife á Kanaríeyjum.
Þessi fyrrum fiskimannabær er í dag eftirsóttur ferðamannastaður sem býður fyrsta flokks aðbúnað hvarvetna sem lýtur að ferðamennsku; náttúru, mannlífi og gistingu. Los Cristianos er í raun sérstakur staður. Sérstaðan felst í andrúmsloftinu sjálfu og nálægð hafnarinnar, sjónum og ströndinni. Hér er allt tekið með rólegheitunum og hér er gott að vera í góðu fríi. Marglitir og allskonar bátar dóla letilega víða við hafnir og strandir og svalur vindur leykur um vanga, sjálft Atlantshafið.

Gamli bærinn iðar af lífi, margar stórar og smáar verslanir og ótrúlegur fjöldi allskonar veitingastaða og kráa á hverju strái, - allt með stæl og sérstökum blæ. Fáum okkur bara sérlagað kaffi á einhverjum götukaffibarnum eða einn kaldan á næsta bar. Engin læti, setjumst niður, látum heillast, slöppum af.

Annars eru frábærir staðir að skoða út um allt og margt að upplifa þegar maður nennir ekki lengur að vera í sólbaði. Gamli markaðurinn í miðbænum er skemmtilegur og stutt er í Aqualand og Siam Park, einn stórkostlegasta vatnagarð Evrópu. Fjöllin eru á aðra höndina og freistandi strendur og sjór á hina. Los Cristianos er flottur staður.

Hafðu í huga...

...að það eru þrjár H&M búðir á Tenerife. Hvað þýðir það? Jú, verslunarleiðangurinn getur ekki klikkað!

Skemmtileg staðreynd:

Blekfinka er fugl. Í alvöru. Hann er náttúrutákn Tenerife og hefur meira til brunns að bera en fyndið nafn. Hann er blár, vantar kannski smá lit í hann. En hann er samt flottur.

Ég verslaði hattinn, sólgleraugun og bolinn í H&M. Starfsfólkið þar er farið að þekkja mig!